Тешко на земјава додека на чело на Уставниот суд е Елена Гошева

Што е ова, Уставен суд ли е, или? – праша уставната судијка Гзиме Старова на денешната расправа по точката на дневен ред да се поведе постапка за укинување на измените на законот за помилување кои му забрануваа на Претседателот на државата да помилува лица осудени за изборни инциденти, за педофилија и за тероризам и злосторства против човештвото.

Прашањето на судијката Старова, само ја отслика жалната состојба во која се наоѓа денеска Уставниот суд, кој личи на се, или повеќе на панаѓур, отколку на суд, на што, веројатно и мислеше судијката Старова, дали ова е суд или ПАНАЃУР? (наше толкување).

За да ви доловиме како изгледаше расправата во Уставниот суд, „Сведок“ ви претставува неколку ситуации од кои сами може да заклучите дали ова треба да биде амбиент во кој работи Уставниот суд и дали некаде, во некој Уставен суд прво, има судии кои зад себе немаат правничка и судска кариера, и второ, дали тие се однесуваат како да се деца од градинка, а претседтелката на судот Елена Гошева, чиниш во секој момент ќе извади прачка и ќе почне да ги тепа судиите кои решија да се спротивстатват на нелогичностите со аргументи.

Гошева, неколку пати ги опомена четворицата судии кои не гласаа за поведувањето на постапката да ги скратат дискусиите, зашто, ако продолжеле така, ќе „седеле во судот до 6 сабајле“.

Чиниш, на претседтелката на Судот и останале гоблените недовезени дома, па сакаше и оваа точка да ја протурка набрзина и без дискусија, како што немаше дискусија за некои иницијативи изнесени на седницата.

Но, самата седница почна со кавга, кога Гошева не сакаше да ја прифати забелешката на судијката Наташа Габер Дамјановска да се тргне нејзиното име од предлог одлука која им била поделена, без никој да ја праша дали таа се согласува за текстот. По кратко натегање, Гошева призна дека  таа стои зад таквата предлог одлука.

Вториот судир на Гошева со судиите беше кога побараа исправка на записникот од минатата седница, каде што пишувало дека гласале „против“, а тие воопшто не гласале за одлуката. И овде Гошева имаше свои чудни објаснувања, како и по барањето да не се расправа за точката за помилувањето, се додека Јован Јосифовски не се вклучи па и објасни дека треба процедурално да го стави на гласање.

Сепак, дискусиите на четворицата судии кои беа против поведување на постапка, ја вадеа од кожа Гошева, која дури три пати ја опомена судијката Гзиме Старова да се држи на темата.

-Навистина не знам што ви е. Денеска трет пат ме опоменувате, а јас напротив, мислам  дека се држам баш за темата-врати судијката Старова, која од петни жили се обидуваше да им објасни дека уставната одредба, да се уреди со закон, е токму основот дека тоа што не е регулирано во Уставот, се регулира со закон, како што е на пример и зконското решение за можноста претседтелот да одликува, или судии да не можат да бидат членови на политички партии, и серија други одлуки на Судот, во кој, работите биле уредени со закон и како такви останале на сила.

Но, тонот на кој им се обраќаше Елена Гошева наликуваше на „лоша учителка“ од градинка, која со стапче сака да дели воспитни лекции на деца, а не на колеги од ист ранг, со докторски титули, наспроти просекот што го имала Гошева од нешто над 6 за многуте години студирање (види прилог текст во Вест кога бил изборот на Гошева за Уставен судија).

Покрај Елена Гошева, за атмосферата „однесување како во детска градинка“ да биде комплетно, се погрижи и судијата известител Никола Ивановски, за кого „Сведок“ објави дека ако ја протурка иницијативава треба да биде нов претседтел на Судот, кој на серијата забелешки за многуте пропусти во рефератот, и „одбруси“ на судијката Старова дека „не носел индекс за да му напишела оценка“, алудирајќи на нејзиниот професорски беграунд како професор на Правниот факултет.

-Овде сум највозрасна и веројатно на сите сум ви давала оценки, можеби и Вас, бидејќи сте многу помлад од мене, но откако дојдов во судов, токму вие се трудите да ми ги укинете сите титули-возврати судијката Гзиме Старова.

Според „тефтерчето“ на „Сведок“, професорката Старова не му предавала на Ивановски, бидејќи тој завршил на Правниот факултет во Битола, а според уверението што го достави кога го избираа за член во Советот на обвинители, тоа беше полно со 6 и 7, како оценки, вклучувајќи ги и кривичните предмети, иако подоцна Ивановски бил истражен и судечки судија во кривично.

И додека четворица судии му најдоа десетици  сериозни забелешки на рефератот подготвен од судијата Ивановски, вклучувајќи го и обидот да им подметне три одлуки како пракса на судот, кои излезе дека биле за работни односи, девизно работење и прашање од пензиско осигурување, Елена Гошева не само што рече дека рефератот е најсовршен, туку и порача дека ова треба да биде урнек како да се правеле рефератите во Уставниот суд.

А, во рефератот, основната фалинка, за која студент не би добил ни шестка, беше, кое е спорното прашање, врзано со неуставноста на законот за да може да се дискутира по него. Но, Ивановски доби меценство од Гошева, со што во целост се потврдија нашите информации декаова е „крштевањето“ на Ивановски како наследник на Гошева, чиј мандат истекува оваа година и нема право на нов.

На седницата, со „силни“ аргументи се спротивстави и Јован Јосифовски, кој гордо истакна дека него не го интересираат како „помилуваат кралеви и цареви“, туку пред него имал Устав и одлучувал по него, и каде што е сигурен дека овој закон не е Уставен.

Кралевите и царевите беа „пофалба“ за судијата Сали Мурати, кој како што рече, направил споредбена анализа како е во системите на околу 20 земји како што се Белггија, Данска, БиХ, во кој дури и кралот не може да помилува осудени министри или државни функционери за корупција.

Но, во ниту еден момент, додека Јосифовски возбудено и со треперлив глас се расправаше со Сали Мурати, не спомена дека неговиот син е генерален секретар на Кабинетот на претседателот на РМ, и тој, има директен судир на интереси, бидејќи одлучува за права што му се ускратени на Претседтелот.

Ова е сериозна злоупотреба на функцијата, бидејќи неговиот глас е одлучувачки. Но, за жал, во земјава нема орган кој може да направи ревизија на Одлуката и поради гласањето на Јосифовски истата да ја суспендира од правниот промет.

Седницата изобилуваше со уште неколку кавги, што предизвикуваше мачнина кај луѓето во салата.

Новионарот на „Сведок“ кој 20 години ја следи работата на Уставниот суд, беше шокиран од ниското ниво на комуникација и начинот на кој Елена Гошева им се обраќаше на судиите, но и од нејзиното непознавање на Деловникот за работа, бидејќи ги исклучи новинарите кога судиите одлучуваа за утврдување на предложениот дневен ред, што не е тајно.

При вториот обид кога се реши да ги отстрани новинарите и сугерираа дека тоа не е деловнички, па се сепна и се повлече.

Седниците на Уставниот суд се јавни, а јавноста се исклучува само на крајот, кога се гласа за конечната одлука.

Во текот на расправата не се вклучија само судиите Вангелина Маркудова и Владимир Стојановски, но со кревање рака ја запечатија одлуката да се поведе постапка, и во пакет со однапред зацртаната цел да може да се помилуваат осудени за изборни инциденти, сега ќе може да се помилуваат и педофили, силувачи, осудени за меѓународен тероризам, за дела против човечност.

-Како ќе ја оправдате оваа одлука Вие кои жестоко го браневте ставот дека е уставно да се објавуваат педофилите на интернет, Вие кои семејството го стававте на прво место, како ќе се чувствуваат жртвите на силување, децата кои се нападнати од педофили- беа дел од дискусиите на Старова и Габер, но на ваквите забелешки Никола Ивановски рече дека тој смета дека треба да има помилување за сите, бидејќи вака, некој не би можел да е помилуван и за 1 грам дрога или за изборни инциденти, ама можело да се помилуваат за други, потешки дела.

Владата и Собранието, во одговори до Уставниот суд побараа да се отфрли иницијативата, но судиите блиски до владејачката ВМРО ДПМНЕ не го прифатија.

Со оваа иницијатива, која со брзина на светлината влегла и била сработена во Уставниот суд, власта на мала врата дозволи помилување на идните осудени кои многумина ги препознаа веќе осомничените во акцијата „Титаник“ на СЈО.

Само неколку факти кои ги инесоа судиите на седницата, фрлаат јасна светлина зошто 5-те судии: Никола Ивановскии, Елена Гошева, Јован Јосифовски, Владимир Стојаноски и Вангелина Маркудова кренаа рака за поведување постапка за укинување на законот: иницијативата во Уставниот суд била примена на 5 февруари, распоредена кај судијата Никола Ивановски на 8 февруари, побарано и добиено мислење од Владата и Собранието на 10 и 12 февруари, и за само 2 недели подготвен реферат и ставена како точка на дневен ред.

-Колега Ивановски, ќе ни кажете ли зошто и како ја сработивте оваа иницијатива толку бргу, ако е факт дека Вие сте судија кој има најмногу нерешени предмети во судов кои датираат од 2014 и 2015 година- праша судијката Наташа Габер Дамјановска.

Затоа, гледано од страна, со ваков Уставен суд начие чело е Елена Гошева, а во неа седат судии кои немаат правен стаж и докажани резултати, само Господ може да ни помогне.

Одлуката за помилување педофили, терористи и кршачи на кутии ги зовре социјалните мрежи а стотици граѓани веќе протестираа пред Уставниот суд.

На социјалните мрежи се појавија фотографии на кои таблата од Уставен суд се „преименува“ во НЕНАДЛЕЖЕН суд или е фрлена во корпа за отпадоци, што го симболизира досегашното пасивизирање на Уставниот суд по многу прашања за кои се прогласуваше за ненадлежен.