Новинарски истражувања

Макфакс: Политиката го подели СЈО во табори

објавено:


„Чарлиевите ангели“ ги нема. Катица Јанева, Ленче Ристоска и Фатиме Фетаи речиси една година не се појавуваат на заеднички прес-конференции. Во јавноста и на социјалните мрежи сè погласни се критиките за работата на специјалното јавно обвинителство и ослабената доверба во оваа институција.

Три и пол години по формирањето, целосен судски епилог има за само два случаи, а сè погласни се шпекулациите дека во СЈО владее поделеност на обвинителите во табори кои меѓусебно не се согласуваат за делувањето на ова Обвинителство, па тие разлики во мислењата лесно се забележливи и во јавноста.

Трите жени кои беа симбол за СЈО ретко може се видат заедно во јавноста, а речиси една година Ленче Ристоска и Фатиме Фетаи не даваат заеднички изјави. Според нашите извори, со слични ставови на една страна биле обвинителките Катица Јанева и Лиле Стефанова, а на друга страна Ленче Ристоска и Фатиме Фетаи.

Од друга страна, сè поприсутна во јавноста е главната специјална обвинителка Катица Јанева, која според најавите, во вторник ќе се појави во 1ТВ, каде што заедно со обвинителите Лиле Стефанова и Трајче Пеливанов треба да одговараат ѝ на прашања на гледачите. Токму во фирмата сопственик на 1ТВ, „БМЈ Медиа Груп“, работи синот на Јанева, младиот гевгеличанец Лазар Јанев, за кого веќе беше објавено дека пред вработените бил претставен како „директор на правна служба“. Пред точно два месеци, Јанева беше гостинка на 1ТВ и се фотографира со сопственикот на телевизијата, Бојан Јовановски, со назнака дека станува збор за „работен состанок“.

Во СЈО во последнава година во целост се смени практиката на комуникација со јавноста. Последната прес-конференција СЈО ја одржа на 21 март минатата година.

Повеќе нема брифинзи со новинари, а на обвинителките Ристоска и на Фетаи не им е дозволено да даваат интервјуа и изјави. Целосна затвореност владее и во однос на истрагите. Случајот „Империја“ во кои меѓу другите се осомничени и бизнисменот Јордан Камчев и ексдиректорот на УБК, Сашо Мијалков, беше отворен пред повеќе од 2 месеци, а од СЈО нема дополнителни информации освен дека истрагата е сложена.

Сите обиди на „Макфакс“ да обезбедат брифинг за случајот беа залудни. Новинарите меѓу себе коментираат дека ова обвинителство кое наметна транспарентно работење последнава година се затворило, иако обвинителите поминале серија обуки за комуникација со јавноста. Тоа остава простор за шпекулации во постапувањето на предметите на Обвинителството. Од друга страна, во редовното обвинителство се спроведува тренинг за односи со јавноста на обвинителите.

Според нашите информации, во специјалното јавно обвинителство меѓу некои од вработените владее незадоволство од начинот на работа, особено по последните политички случувања, амнестии и повици за помирување, кои во голем дел влијаат и врз актуелните предмети кои се во судска постапка, но и на оние кои се во истрага и предистрага, а во кои меѓу другите се вклучени и Сашо Мијалков, Елизабета Канческа – Милевска, Али Ахмети, Бујар Османи.

Ексминистерката за култура Канческа Милевска е инволвирана во предистрагата за предметот „Скопје 2014“, кој е еден од најобемните предмети на СЈО, додека за Мијалков се водат повеќе судски постапки, а предметот за агенцијата за обезбедување СГС е во предистрага.

Во процесот на помирувањето наголемо се споменуваа и измените во Кривичниот законик, односно членот 353 став 5 кој ја регулира злоупотребата на службената положба преку јавните набавки. Доколку дојде до промена на овој член, како што беше најавувано, помали казни или ослободување од одговорност ќе добијат голем број обвинети во случаите на СЈО, меѓу кои и Мијалков.

Уставниот суд сè уште не расправал по иницијативата на адвокатот Еленко Миланов кој бара судиите да се произјаснат за овој член од Кривичниот законик.

Сите овие политички инволвирања кои допираат и до СЈО, според нашите извори, довеле до голем раздор во работата на институцијата која има годишен буџет од 3.7 милиони евра. Дел од обвинителите се разочарани од фактот што нивните предмети и нивната работа зависат исклучително од тековната политичка ситуација, па токму затоа во последниов период и не се работи на нови предистраги, бидејќи се чека исходот од тоа што ќе се случува со институцијата и дали евентуално одредени функционери од претходната, но и од актуелната власт ќе избегнат одговорност.

Мери Јордановска/Васко Маглешов - Макфакс